تسأل عن الراتب في المقابلة؟
كم مرة سمعت من مرشد مهني أو صديق يقولك انتبه تسأل عن الراتب في المقابلة؟ أو لا تقول راتبك الحالي؟ أو إذا سألوك.. لا تجاوب أو قل راتبك بزيادة 30%! ونصايح كيف تتعامل مع الموضوع. كثير صحيح؟ وسؤالك الحين أكيد هو: والحل؟
ليش مسؤولي التوظيف عندهم مشكلة مع سؤال الراتب؟
لأن مسؤولي التوظيف عادةً يهتمون بفكرة “الانطباع الأولي” فما يبغونك تسأل هالسؤال، لأنّه يهمهم إنك تعطي انطباع إنّ الراتب مو قضيتك الأولى وإنك تهتم بالعمل والانتاجية والابداع أكثر. وهذا الواقع مع بعض الممارسات غير الصحية في الموارد البشرية. لأنّ للأسف بعض من ممارسي الموارد البشرية زي ماقلت لك يهمهم فقط “الانطباعات الأولية” و مو عمليين ومحترفين، ويعتبرون سؤالك هذا إشارة إنك مو احترافي. يعني المفروض ما نقول لك لا تسأل، لكن نقول إذا سألت وجاك عقبها رفض، فخلك مبسوط إن الله فكّك من جهة ماهي احترافية، لأنّه كان لازم يعلمونك عن الراتب بدون ما تسأل أصلًا!
أبشّرك.. الحكومة بتحلها!
وبسبب هالممارسات غير الصحية، وبسبب إنّ المتقدمين صاروا في حيرة مع الموضوع! نقولك.. تطمّن ترى المشكلة عالمية ومو عندنا بس! قبل ثلاث شهور أعلنت ولاية New York قانون “الإفصاح عن الأجور” والمقصود فيه إنّه يجب على الشركات قانونيًا إنها تذكر الرواتب في اعلانات الوظائف. وذكرنا الخبر في عدد سابق للنشرة. طبعًا القانون طلع لأسباب مختلفة، أسباب سياسية واقتصادية، ويقولون عشان محاربة العنصرية والتمييز، وعشان بعد إنّ الدولة تفهم الأجور زين في سوق العمل وتصير تسوي دراساتها وقراراتها الاقتصادية بشكل دقيق، إلخ..
ولأننا جزء من هالعالم، نبشرك إنّ وزارة الموارد البشرية والتنمية الاجتماعية أعلنت عن قانون بيصدر خلال فترة قريبة بمشيئة الله راح يجبر شركاتنا على ذكر الراتب في الاعلانات الوظيفية وتقريبًا لنفس الأسباب!
الحل!
أولًا وقبل أي شيء.. أنت من يقدّر الأمور في إنّك تسأل أو تجاوب عن الراتب. فكونك في وظيفة حاليًا غير عن لما تكون عاطل. فالأفضل بشكل عام وبحكم وجود بعض الممارسات غير الصحية في الموارد البشرية، هو إنّك تدقّق على طريقة المقابلة معهم قبل ما تفكّر في أي موضوع ثاني. فمثلًا: إذا ما سمعت أسئلة عن تخصصك وخبرتك ومهامك، وعن تجربتك المهنية وكيف واجهت تحدياتها وكيف حليتها، ولا طلبوا منك عرض باوربوينت عن مهاراتك، أو اختبروك بتقييم. غالبًا لا تسأل لأنه أصلًا نبي نقول لك لاتفكر تقبل أي عرض منهم. بكل بساطة.. هم ما قيّموك زين ولا عرفوك، وغالبًا تبي تنشب معاهم!
واذا تعاملوا معك بهالطريقة المحترفة. اطمئن. أصلًا ما يحتاج تفكّر إنك تسأل. لأنهم بيعلمونك من بدايتها عن الوظيفة ومهامها وتفاصيلها ونطاق راتبها. شفت كيف سهلة؟
عاد لما تكون عاطل أو مضّطر. وقتها لا تسأل ولا تدقق واجد، وخل الأمور تمشي لين ربك يحلها. وماعليك الوزارة جاية وراح تضبّط الأمور!
|
